السلام عليكم
اليوم بنطلع من جو الخواطر شوي وبحجي سالفة
يقول انتونيو :
الآن الساعة الثانية ظهرا بتوقيت دولة الكويت
راجع البيت من بعد الدوام
ومستانس الغدى بره اليوم
نزلت من السيارة
ودشيت البيت
وانا اصعد الدري
ولا بدقة التلفون
المتصل : السلام عليكم طال عمرك
أنا : (مستغرب) وعليكم السلام يا هلا تفضل
المتصل : طال عمرك في موضوع بخصوص الدوام
(لاحظوا كثرة كلمة طال عمرك ، دخلني جو أن انا واصل وايد )
أنا : اي نعم أخوي موضوعك عندي وان شاء الله مرني المكتب وما يصير خاطرك الا طيب
المتصل : مشكور طال عمرك
عساك ذخر لنا ما قصرت
هذا العشم والله فيك ...
(وانا داش جو ، الريال يرفع فيني ومستانس على هالكلام )
وفجأة
اسمع صوت يمي يقول :
جسوووووووووووووووووووم
جسوووم يلا غدى
(قمة الصدمه )
(الوالد ينادي)
لا شعوري ركضت
وانا ماسك التلفون
وغترتي تركض وراي
خايف الي على الخط يسمع الفضيحة
قتله وانا الهث من الركض : حياك الله اخوي في المكتب يوم الاحد مع السلامة
(قمة الاحراج)
قعدت افكر
الوالد شفيه فصل مرة وحده كل هذا يوعان
انزين قاعد اتكلم بالتلفون انطر شوي
المهم
نوبة من الغضب المضحك مرت علي ،
رجعت اشوفه شنو يبي بعد النحشه
أنا : هلا يبا آمر
الوالد: ما تبي غدى
أنا : لا يبا مشكور معزوم مع الربع بره
الوالد: وربعك اعزوبية مثلك أكيد
(يحسسني عمري ستين سنه ، وانا بالعشرينات )
أنا : اي يبا اعزوبية
الوالد : ما تنلامون حياك الله
أنا : مشكور عساك سالم
مشيت وانا اجر اذيال الموقف المحرج
المهم ولا اشوف الوالده تتمشى
الوالده : هلا يمة شلونك
أنا : بخير يطولي عمرج
الوالده: تبي غدا
أنا : مشكورة لا بطلع يمه
تغدي انتي بالعافية
الوالدة: ناطره ابوك يمه
(بقمة الشر والانتقام للموقف المحرج من الوالد)
أنا : يما تنطرينه ما دريتي
كاهو اهناك قاعد يتغدى
وانتي يا غافلين لكم الله
افا والله بعد هالعشرة الطويلة
يتغدى عنج وما ينطرج
بعد اربعين سنه زواج افا والله
(شرير صح)
الوالده : هو بذمتك ، افا والله وأنا اللي ناطرته
(مسكينه)
وحده بوحده والبادي اظلم
واسمع الوالده تقوله : افا والله ليش ماتنطرني شدعوة يا حافظ
الوالد : ماكليت شي يبا ناطرج توني بادي
(نبرة صوته فيها قلق)
يا جماعه لا تفهموني غلط افكار شريره تحوش الواحد ساعات
لكن الفكرة الاساسية :
ترى مهما كبرنا نبقى في عيون ابائنا اطفال مهما علت المناصب
ومهما كبرنا نبقى اطفال باعينهم
نشكركم ونحبكم
اللهم اعنا على البر بوالدينا والمسلمين يارب العالمين
اللهم اعنا على البر بوالدينا والمسلمين يارب العالمين
اطفال مهما كبرنا
دمت بالف خير
:)
هناك 16 تعليقًا:
أخوي طال عمرك لووول
استمتع بهذه المواقف و احفظها بذاكرتك في يوم راح ترجع لها و تذكرها و تترحم على أيامها .. و أهلها ...
الله يحفظ لك والدينك يارب و يتمم عليك ببرك لهم و رضاهم عليك
أنا عندي من هالمخزووون وايد و قمة في الإحراج و الضحك بنفس الوقت و لي الحين كل ما اذكرهم أضحك لكن تدري الضحك و قمة الإحراج وين لما يصير نفس الموقف إلي مر فيك و إنت في الدوام اهني تعال رقع
'
'
'
'
'
'
أنا صار لي :)
لووووووووووووول D:
بس شعور حلو انه مهما كبرت اكو احد يهتم فيك و يداريك الله يخليهم لك انشالله ^^
عاد انا اخر العنقود بالبيت و الكل مدلعني و يعاملوني كياهل مو بس امي و ابوي حتى اخواني
قبل فتره كنت اقول حق اختي باقيلي سنه و اقص الليسن ولا تنصدم تقولي لا انتي اختي الصغيره شلون كبرتي ما يصير تكبرين P;
هاهاهاي
والله موتني من الضحك
ربي يحفظهم لك ويخليهم لك ويخليك لهم
:)
عاد تدري والله انك صاج
لو شنو كبرنا...نتم يهالو وصغار يدارونا ويحاتونا
أذكر مرّة كنت بالعمليات وامي داقة
فالممرضة يات اتحط التلفون على اذني
والا التلفون مو لازق فالصوت كله برا
ادلعني باسمي...
واتقول
حبوبتي متى اتيين؟؟؟
فانا مبتسمه واقولها
يمه انا بالعمليه اخلص واكلمج
شتوقع ردت؟؟
يمه!!! انتي الحين بيدج مشرك وابره
واتردين عالتلفون يمه جم مره قايلتلج ركزي لاتذبحين أحد:)
والي حوليني ميتين من الضحك
قتلها يمه التلفون على اذني ....وترى غرفةا لعمليات كلها
اسمعت شرايج انقط اللتفون بالنص وانسولف يميع
اتقولي سلمي عليهم!!!!
يعني 13 نفر بالغرفة:)
شسلم شخلي؟؟؟؟
وكل هذا والمريض واعي ويضحك معاي
( شغلي مايحتاج بنج كامل :) )
المهم عاد لما صكيت ازفهم كلهم اقولهما للي بيعلق يويله
اولهم انت (المريض)
ولما رجعت البيت..بعد زفتني..:)
ياحلوهم الله يحفظهم يارب
وجني قرقت؟؟؟
مساالخير
صباح الياسمين
:)
اسعد الله صباحك طال عمرك
واطال بعمر والدينك ورزقك برهم ورضاهم وبلغهم بشوفتك معرس وبأعلى المراكز دايم قول آمين
:)
نعم نظل بعيونهم أولئك الأطفال الذين لم ولن يكبرون
تخيل:
رغم انتقالي لحياتي الجديدة ما زالت أمي ترسل لي رسائل كل ليلة:
نامي مبجر وراج دوام
اقري المعوذات نامي على جنبك اليمين
لا تنسين صلاه الفجر
:)
رغم اني كبرت ما زال ابي يتصل صباحا ويوصي:
لا تطلع بنتي من غير ريوق ترا تدوخ
وحين سافرت معه اول مرة دونهم اوصاه ابوي ان يمسك يدي حتى لا اضيع
تخيل
:))
الجودي
يا هلا ومرحبا فيج
الله يسلمج ويخليج اياهم ان شاء الله يارب
لا عندج مواقف اكيد لازم تقولين لنا عنهم :)
بالانتظار المشاركة في هالمواقف :)
حافظج الله :)
دمتي بالف خير :)
بينق ون
ما شاء الله عليج ان شاء الله ليسن الهنى والتوفيق يارب ..
اي مهما كبرنا نبقى اصغار ..
الله يوفقج ان شاء الله واشوفج تقحصين :)
دمتي بالف خير :)
تقبلي ودي الكبير :)
سله يا سله :)
لووول طال عمرج ضحكت والله جعل الضحكة ما تفارقج ..
بعز العملية زفة قلعتج
لو انا من المريض جان خذيت التلفون وكلمت الوالدة قتلها خالتي جزاج الله خير على هالدكتورة وصيها علي وترى اذا ما طبت لا تغدينها عندج اياها
:)
استمتعت بما سطرتي سلة والله يخليلج الوالدة يارب ..
نعم صغار مهما كبرنا ..
ترى ناطر قصة منج شدي حيلج عاد ..
ودائما سلة تجمعنا ..
دمتي بالف خير :)
استكانه
عروستنا الجميلة
انا اقول وانا داش مدونتي اشم بخور طلعت العروس اهني عندي :)
مواقف عجيبة من الاهل يا محاميتنا العزيزة ، بعيونهم صغار مهما كبرنا صج شوفي لي اي درجة وحتى وانتي مع شريك حياتج الله يخليه لج يحاتونج ويحاتون شلون عايشيين ، شنسوي صغار بعيونهم مهما كبرنا .. :)
نورت مدونتي يا العروس :)
الله يحفظج ان شاء الله ويوفقج بحايتج ويحفظج من كل شر ويخليلج والديج يارب
دمتي بالف خير :)
تقبلي ودي الكبير :)
لوووووول
اي والله صاج مهما كبرنا نظل بعيونهم عيالهم الصغار!
ويلا ميخالف على الاحراج تكبر وتنسى طال عمرك! :)
البش مهندسا :)
هلا طال عمرج :)
اي والله مهما كبرنا نظل صغار :)
على قولتج نكبر وننسى طال عمرج :)
وناطرين رجعتج لنا بالسلامة ان شاء الله
دمتي بالف خير :)
اييييه يا جاسم
طحنا على اسمك
:)
ابوي الله يرحمه كان له مواقف العن
وكنت وقتها انقهر واروح اشكيه عند امي
الحين اقول
حيا الله ذاك الزمان
ليته يعود
والمه حيل واقول له يبه ولهت عليك
:)
الله يخليهم لك ويديمهم فوق راسك قول آمين
هلا بالزين
نورت المدونة
رحمة الله عليه ويرحمنا برحمته
ويخلي إلي باقي لنا ان شاء الله
مواقف مهما نسوي نبقى أطفال
الله يخليهم لنا أجمعين يارب
واسمي يا الزين مو جاسم
تمويه هذا :)
أنا ماكتبته لأن الكل يعرفه
خصوصا لما يوصلكم
أيميل مني ان علقت على الموضوع
أيميلي اسمي الصجي
صادووه واحد صفر حقي الزين .
الزين ماي نيم عبدالمحسن
عساج على القوة يبا
سعيد دائما بوجودك
وكل يوم تعالي دقي كرت
ودي
ودج
متبادل دائما :)))
دمتي بألف خير
يا حلوهم ..
عسى الله لا يخليك منهم
و لا يخليهم منك ..و يرزقك برهم
احب هالمواقف ..العفوية
اللى فيها ضحك ..برىء..
و ترى لو توصل اعلى المراكز
بتظل عبدالمحسن الصغير ..
عند امك و ابوك ..
الله يرزقك رضاهم .. قول آميين
صبحك الله بالنوير
رسمت بسمة من الصبح :)
*******************************
النور :)
ويخليهم لج بعد وطول بعمارهم ويرحمهم ويعينج على البر فيهم ويرحهم ويرحمنا برحمته معاهم ويرزقنا ويرزقج رضاهم يارب :)
مواقف قليله من كثيرة تضع بعض السكر
احيانا على روتيننا اليومي لينتهي
بضحكه غريبة عن الواقع :)
النور وجودج دائما يسعدني :)
والحمدالله انني رسمت بسمة على وجه النور
ليرزقني الله النور معك يارب :)
تقبلي ودي الكبير
صباحج حب :)
الموقف ضحكني بصراحه
حلو الموقف بعدين تقوله حق عيالك
الله يخليلك اهلك و يحفظهم يا رب
و يخليك لهم سند و ذخر
ودي و تقديري
تحياتي
عسى دوم هالفرح :)
الله يسلمج ويخليج لكل من يحبك وتحبين
ورزق الله الفرح والسرور دائما
:)
تقبلي تقديري
:)
إرسال تعليق