الجمعة، 21 يناير 2011

مكالمات لم يرد عليها





الوقت
1:14
فجرا

نايم وما عرف للشيطان طريج
الدار بارده وايد
وخايف اتحرك احوش مكان بارد بالفراش واقعد وتتقطع النومه العميقة
في ظلام وبرد غرفة النوم



فجأة


اسمع صوت التلفون يرقع باذني
على حظي مو حاطه سايلنت والمكان مظلم وليت التلفون يعور العين يبيلي نظارة شمسية عشان اشوفه من قوة الاضاءة

يرن التلفون من فترة طويلة وما يلقى اجابة
فتظهر بالشاشة

مكالمات لم يرد عليها

منو المتصل

اسم المتصل ابليس

اعوذ بالله


الحين ارد ما ارد

شنو هالاسم

بل بل هالحزة عاد

شوي ولا يتصل مره ثانية

قلت خل اشوف اشيبي ؟



أنا : الوو
اهو : هلا بالطيب الغالي
أنا : تدري الساعة جم
اهو : ادري ، وكاني يايك ؟
أنا : تييني شسالفة شغلتني وهالحزة عاد ؟
اهو : اصلا هذا احلى وقت ، انا توني امنوم المدام وقاعد اتسحب لي بره ربع ساعه وعندك ، ابيك بشي مهم ، باي .


خير اللهم اجعله خير الله يستر


شسوي الحين ؟ اطنش ؟ انام ؟ اقعد ؟ اشوفه شنو يبي ؟

الله يستر

يرن التلفون
أنا : الوو
اهو : انا بره
انا : دش داخل
اهوا : لا البس وانزل بنطلع ، باي .

اقوم استعد البس ملابس ثقيلة الجو بره بارد مو غشمره وما يندرى أي مصيبة صايره هالحزة يارب سترك

اركب السيارة


أنا : السلام ، تدري الحين الساعه 2 الفير
وانت ياي تشوفني هالحزة اشفيك ؟
ومنحاش من مرتك جنك حرامي ، شصاير وين بنروح ؟
هو : كل شي بوقته حلو يا حلو ، راح تشوف وتعرف .

ونمشي بالسيارة

والدنيا ظلمة والشوارع فاضية

والجو بارد

وبليس دايس بالسياره وماشي على خط الملك فهد

وانا ملتزم الصمت

واشوف في نظراته للطريج نظرات غريبه فيها مصيبة

الله يستر

سرحت بهدوء الليل والجو البارد ونمت شوي من التعب
حتى انقطع هذا الهدوء

وصحيت لما وقفت السيارة

هو : تفضل
انا : شنو وين أنا
هو : ركز بالمكان
انا : الشالية من صجك جان قلتلي على الاقل ايب مايوهي .
هو : لا تطنز يا باشا الجو بارد ، تفضل داخل الشالية ، في شخص منتظرك .

اووف

شسوي فيه

انسان غريب

لو مو عشرة العمر جان كفخته باكبر ما عندي

نزلت من السيارة
سكرت الباب
واتجهت للباب الرئيسي
امشي

بممر ظلمه يودي لي مدخل الشاليه
واهوا يمشي وراي

واحس انه السالفه فيها شي

ماكو احد موجود المكان ظلمة

والباب الرئيسي مقفول
شرايك انروح ندخل من الباب الخلفي اللي على البحر


اطالع ورا
ماكو احد

وين اختفى



وينك ابليس ابليسووو ؟

وين راح هالدثوي ؟

الناس قريب الفير

ومقعدني ابهالبرد ورايحين الشاليه
وما ادري

شنو صجه من جذبه
واخر شي يلعب لبيده معاي

صج مو وقته


امري لله
خل اروح لي الباب الثاني ذبحني البرد
الف من ورى الشاليه ناحية البحر

وامشي لي الباب الخلفي
والهوا البارد يثلج الصدر


اقرب من الباب

واحاول افتحه

وفجأة


الباب ينفتح

والليتات تنفتح


وصراخ يصير

وناس وايد موجودين

واسمع

هابي نيو يييير

وكل عام وانت بخير

وانا اقوووووووووول في شي

قلبي حاس
والله ومالت عليكم هذا وقته
تضحكون ماشي
بس اعجبتني الحركه



طلع ابليس ميمعكم وكل واحد يدش تفاجئونه بالحركه
ماشي


ويقترب واحد من بين الحضور باتجاهي
ويفتح ايده

وانا مستغرب
ويحضني

ويهمس باذني
كل عام وانت بخير


اغمض عيني شوي
وابتسم

لكن
اسمع صوت رنة تلفوني

افتح عيني
الاقي نفسي بغرفتي


المكان ظلمة وبارد اكثر من الأول
اطالع التلفون

المتصل ابليس
ارد بكل توتر
انا : الوو
هو : كل عام وانت بخير
انا : شسالفه
هو : دشينا 2011 يا صديقي العزيز وأنت نايم
أنا : مو فاهم .
هو : كل عام وانت بخير ، باي باي .



شسالفة
فتحت الليتات

وتأكدت من التاريخ
احنا فعلا في 2011


اتصلت عليه

انا : كل عام وانت بخير
هو : وانت بخير تو الناس وصح النوم
أنا : تدري حلمت
هو : خير ان شاء الله
انا : حلمت باحتفالنا بالشالية سنة 2009
ورجع نفس السيناريو لما اتصلت علي .
هو: هههههه يا القديم ، باجر اشوفك وقولي التفاصيل ،

مرتي تناديني ما اقدر انحاش هالمره ، باي باي









مكالمات لم يرد عليها
هي ذكريات قد تكون جميلة وقد تكون مؤلمة
بيدنا أن نختار نرد أو لا نرد على نداء
الذكريات

قصة من قصص ناس كثيرين
يعيشون ذكريات ويتعلقون بها
لنتعلق بكل ما هو جميل
واذا كان النداء مؤلم
يجب أن يكون
مكالمات لم يرد عليها

لنعيش للمتعه والفرح برضا الله وحده
اتمنى لكم في هالسنة كل الخير ان شاء الله

كل عام وانتم بالف خير
اخوك انتونيو

هناك 38 تعليقًا:

Antonio يقول...

سامحوني على التأخير

:)

Unique Girl يقول...

وناااااااسه خوش سنه صارت 2009 عيل _^

مووفقين دوم يارب وان شاء الله 2011 تكون احلى بعد _^

غير معرف يقول...

جدا جميل

الله يوفقكم

bokeh of magic * يقول...

لم افكر ابدا ان اضع تلك الافكار كمكالمه لم يرد عليها
فكره رائعه و تغنينا عن كل الم مع تلك الاتصالات
هالابليس كله ملعوزنا
جميل ما كتبته استمتعت بقراءة ما ورائه
مع كل جديد اقرئه يزيد اعجابي بك يا انتونيو
و مسمووح بس مو تطول الغيبه مره ثانيه :)

why me يقول...

جميل جدا

:)



عجبني البوست


وعجبني ابليسووو بحركاته ;p




كل عام وانت بخير
وان شاء الله تكون سنه حلوه عليك

Seema* يقول...

كان لذلك عمقٌ جميل
سنعيش فيه ونتذكره

كل عام وأنت أيضًا بكل خير
:)

سلة ميوّة يقول...

كل عام وانت بخير

:)


ولهنا على بوستاتك


مودتي

Al Pacino يقول...

كل عاااام و إنت بألف خير ياخوي

أبدعت

أبدعت

و أبدعت ..

قصّة جميله جدًا ..

أتمنى بأن لا أعيش بأفراح السنوات الفائته ..

تقبّل ودي و تقديري و أشد إحترامي لك ..

دمت لي بألف خير عزيزي ..

وفاء السحيم يقول...
أزال المؤلف هذا التعليق.
وفاء السحيم يقول...

هههههه
والحلم 2011 متى

Question mark يقول...

حلو وايد خوش حلم,لوووووووول

الجودي يقول...

و إن كان الهدف نبيل ..

و الغاية رضا الله سبحانه ..

إلا إن فكره التخاطب مع إبليس و إن كان وصف لأحدهم لم تستهويني يوما بل اجدها نوعا ما مرعبه ...

أحببت الغاية .. و إن لم ترق لي الوسيلة ...


بالنهاية عودة غريبه كنا جميعا بانتظارها .. وا لغرابة تشفع لك في التأخير دائما ..

كل عام و إنت بخير ..

:)

Antonio يقول...

يونيق قير :)

-----

2009 واقع جميل
2010 لا تذكر
2011 يجب أن لا نعيش الا الاحلام الجميلة

والتوفيق حليفك ايضا بهذه السنة

شكرا يونيق اسعدني مرورج :)

دمتي بخير

Antonio يقول...

دموع الروح

---

زيارة ومرور جميل

والتوفيق لك ايضا

دمتي بخير

Antonio يقول...

بوكيه أوف ماجيك
:)

----

شكرا بوكيه
فكرة راودتني والحمدالله انها لاقت استحسانك

نعم هالبليس اذيه
بس هالاسم له بعد مختلف غير الدارج عند عموم الاشخاص

وجميل انك فهمتي ما وراءه :)
شكرا لزيادة الاعجاب فيقابله بالمثل من غير شك .

وان شاء الله الغيبة ما تطول
اسعدني هالمرور الرائع .

ذا ون
ذا ون

Antonio يقول...

واي مي :)

---

كل عام وانتي بخير وصحة وسلامة

وبليسو اذيه دائما .

اسعدني هالمرور الجميل

ودي الكبير .

Antonio يقول...

سيما :)

----

كم اسعدني ان تعيشي هذا العمق

فالهدف هو في نهاية هذا العمق

بيدنا ان نختار ان نرد على كل نداء
وبيدنا ايضا ان نهمل كل نداء لا يعجبنا

وتبقى سيما محلل جيد للحروف وعمقها

دمتي بالف خير

Antonio يقول...

الدكتور سلة :)

----

وانتي بخير دكتور وبصحة وسلامة

ما تولهين على غالي ان شاء الله

لا نتعلم منج .. ما سميها قصة

اسميها احزاية بس مطورها شوي

ودائما

سلة على الحب تجمعنا

Antonio يقول...

البتشينو :)

----

اهلا وسهلا برأي الزعيم

ومنك نتعلم القصص والحكايات الحلوة

ابداع دائما لقلمك وتميز باعجابك

دمت بحفظ الله ورعايته

تقبلي ودي الكبير

aL-NooR . يقول...

البوست يشدددد
طول الوقت
و انا
ناطرة النهاية
ههههههه
يستحق الانتظار


استانست بالبوست وايد
عساها السنة سنة
خير لك وكل من تحب :)


:))))))

Antonio يقول...

فوفو :)

----

وتبقى الاحلام هي من نختارها ونحققها بايدينا ..

وان كانت كوابيس

فستكون مكالمات لم يرد عليها

اسعدني مرورك

دمتي بخير :)

Antonio يقول...

كوزشن مارك :)

-----

الله يسلمك

وان شاء الله تكون احلامك كلها تفاؤل باذن الله ..

اسعدني مرورك

دمت بالف خير

Antonio يقول...

الجودي :)

----

متفقين على الهدف والغاية


التخاطب من ابليس مرعبة في الوحدة نعم
لكن
من اطلقت عليه هذا الاسم هو ابليس الذي يقنع باسلوب غريب كل شخص يلتقي به على حسب توجهه وبوسيلته .

عودة غريبة :)
اعجبتني هذاالجملة ..

فكرة فل نغلفها بالغرابة

كل عام وانتي بخير

دمتي بحفظ الله ورعايته

Antonio يقول...

النور :)

----

الحمدالله ان الحزاية اعجبتج

والحمدالله هالانتظار كان حلو

وكان الموضوع ممتع لك :)

دائما مرورك جميل

جعل الله النور طريقك وطريقنا دائما

دمتي بحفظ الله ورعايته

Engineer A يقول...

فكرة جميلة بس اتفق مع الجودي ذكر "ابليس" ماكان له داعي خصوصاً ان افكاري قامت تودي وتييب :))

~أم حرّوبي~ يقول...

هههه حلوه ,,,لو اني تلخبطت شويتين وانا كله عبالي ابليس بيخليك تسوي شي مو زين ....وششو شوشو ...

سنة حلوه وطيبة باذن الله تنتظرك ...وعساه ابليس يبتعد عن دربك ..موفق أخوي ^^

Antonio يقول...

البش مهندسا :)

---

يا اهلا وسهلا

يعني تعاونتي علي انتي والجودي

ما اقدر عليكم صراحة

بس اهم شي لا تروح الافكار مني ومنيه

فالغاية تبرر الوسيلة

بس ما تكون الوسيلة خطيره لي هالدرجة

اسعدني مرورج

واسعدني اكثر رأيك الجميل

دمتي بحفظ الله ورعايته

:)

Antonio يقول...

أم حروبي :)

---

الله يجزاج خير ويبعد ابليس عن الجميع

وكل عام وانتي بخير واتمنى لك عام سعيد

وفرح وتوفيق من رب العالمين .

تقبلي

ودي الكبير

الليوان يقول...

فعلا شدتني القصه للنهايه...

ياحليله رفيجك راعي مقالب..

الله يديم المحبه..ويجعل ايامكم كلها فرح وهنا وسعاده

وصلت غاية البوست...
وعندي وايد مكالمات لم ولن يرد عليها

:)

Antonio يقول...

الليوان :)

---

الحمدالله ان القصة شدتج وستمتعتي فيها

والاهم وصول الغاية من خلف ستار الحزاية

كل عام وانتي بالف خير .

وهذا هو المهم كل نداء لا يعجبك فليكن

مكالمات لم يرد عليها .

مرورك اسعدني ودام التواصل .

تقبلي ودي الكبير .

:)

محطات ثقافية يقول...

اسلوبك رائع فعلا اخي
بوركت وكل عام وانت بالف خير
مرة تانية لا ترد على تلفونات نص الليل وخاصة لما يكون المتصل ابليسوو
سلام

Seldompen يقول...

=)

جميل جداً ,,

أجلَ ما أستطيع قوله ,

فلك أسلوب جميل جداً

في تصوير الفكرة التي تريد إيصالها ..


سعدت بزيارتي الأولى هاهنا

ويارب تكون لك سنة خير وسعادة .

تحياتي لك ..

Antonio يقول...

حلم

-----

شكرا على اعجابك اتمنى انك استمتعتي به

كل عام وانتي بخير ايضا

وان شاء لا يكون رد الا على كل ما هو جميل

في جميع الاوقات ..

مرور جميل وكلمات اجمل

تقبلي

ودي الكبير

Antonio يقول...

بن سولدم

------

اهلا وسهلا

الحمدلله لاستمتاعك واعجابك

وايضا فهمك ما وراء الكلمات

اتمنى أن تكون سعيدة كل حكاياتك

زيارة ومرور جميل

كل عام وانتي بخير

والتحيات لك ايضا

تقبلي

ودي الكبير

صفحات مُلطخّة بحروفي يقول...

كل عام وإنت بخير ..
قصّة عجيبة ،
فعلاً أبدعت ..
وبالأخير جنينا ثمار انتظارنا لك ..

Antonio يقول...

صفحات :)

----

وانتي بخير وصحة وسلامة

والحمدالله انها اعجبتك

وانتظارك كان اجمل

فل يكن استمتاعك دائما

بحفظ الله ورعايته

دمتي بالف خير

تقبلي

ودي الكبير

Ra-1 يقول...

حلوة الذكريات :)
ان شاءالله سنة خير وسعادة على الجميع

عبده العمراوى يقول...



شركة رش مبيدات بام الساهك
شركة تنظيف خزانات بالخبر
شركة تنظيف بالاحساء